ਲਾਸ ਏਂਜਲਸ ਤੋਂ ਬੋਸਟਨ ਜਾ ਰਹੀ ਸੀ ਫਲਾਈਟ
ਵਾਸ਼ਿੰਗਟਨ, 7 ਮਾਰਚ, ਹ.ਬ. : ਅਮਰੀਕਾ ’ਚ ਲਾਸ ਏਂਜਲਸ ਤੋਂ ਬੋਸਟਨ ਜਾ ਰਹੀ ਫਲਾਈਟ ’ਚ ਇਕ ਯਾਤਰੀ ਨੇ ਐਮਰਜੈਂਸੀ ਦਰਵਾਜ਼ਾ ਖੋਲ੍ਹਣ ਦੀ ਕੋਸ਼ਿਸ਼ ਕੀਤੀ। ਜਦੋਂ ਚਾਲਕ ਦਲ ਦੇ ਮੈਂਬਰ ਨੇ ਉਸ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਤਾਂ ਉਸ ਨੇ ਹਮਲਾ ਕਰ ਦਿੱਤਾ। ਘਟਨਾ ਐਤਵਾਰ ਦੀ ਹੈ। ਮੈਸਾਚੂਸੈਟਸ ਦੇ ਇਸ ਯਾਤਰੀ ਨੂੰ ਬੋਸਟਨ ਲੋਗਨ ਇੰਟਰਨੈਸ਼ਨਲ ਏਅਰਪੋਰਟ ਤੋਂ ਗ੍ਰਿਫਤਾਰ ਕੀਤਾ ਗਿਆ। ਉਸ ’ਤੇ ਏਅਰਲਾਈਨਜ਼ ਦੀ ਕਿਸੇ ਵੀ ਫਲਾਈਟ ’ਚ ਯਾਤਰਾ ਕਰਨ ’ਤੇ ਪਾਬੰਦੀ ਲਗਾਈ ਗਈ ਹੈ।
ਯੂਨਾਈਟਿਡ ਏਅਰਲਾਈਨਜ਼ ਦੀ ਫਲਾਈਟ ਵਿਚ ਫ੍ਰਾਂਸਿਸਕੋ ਸੇਵੇਰੋ ਟੋਰੇਸ, 33 ਸਾਲ ਨੇ ਲੈਂਡਿੰਗ ਤੋਂ ਲਗਭਗ 45 ਮਿੰਟ ਪਹਿਲਾਂ ਫਸਟ ਕਲਾਸ ਅਤੇ ਕੋਚ ਸੈਕਸ਼ਨ ਦੇ ਵਿਚਕਾਰ ਮੌਜੂਦ ਐਮਰਜੈਂਸੀ ਗੇਟ ਖੋਲ੍ਹਣ ਦੀ ਕੋਸ਼ਿਸ਼ ਕੀਤੀ। ਉਦੋਂ ਹੀ ਚਾਲਕ ਦਲ ਨੂੰ ਕਾਕਪਿਟ ਵਿੱਚ ਇਸ ਦਾ ਅਲਰਟ ਮਿਲਿਆ। ਇਸ ਤੋਂ ਬਾਅਦ ਇੱਕ ਫਲਾਈਟ ਅਟੈਂਡੈਂਟ ਜਾਂਚ ਲਈ ਐਮਰਜੈਂਸੀ ਗੇਟ ਨੇੜੇ ਪਹੁੰਚਿਆ। ਉਥੇ ਉਸ ਨੇ ਦੇਖਿਆ ਕਿ ਦਰਵਾਜ਼ੇ ਦਾ ਹੈਂਡਲ ਪੂਰੀ ਤਰ੍ਹਾਂ ਬੰਦ ਨਹੀਂ ਸੀ ਅਤੇ ਇਸ ਦੀ ਐਮਰਜੈਂਸੀ ਸਲਾਈਡ ਵੀ ਹਟਾ ਦਿੱਤੀ ਗਈ ਸੀ।
ਟੋਰੇਸ ਤੋਂ ਪੁੱਛਗਿੱਛ ਕਰਨ ਤੋਂ ਬਾਅਦ, ਅਟੈਂਡੈਂਟ ਨੇ ਕਪਤਾਨ ਨੂੰ ਜਲਦੀ ਤੋਂ ਜਲਦੀ ਫਲਾਈਟ ਲੈਂਡ ਕਰਨ ਲਈ ਕਿਹਾ। ਇਸ ਦੌਰਾਨ ਟੋਰੇਸ ਨੇ ਅਟੈਂਡੈਂਟ ’ਤੇ ਟੁੱਟੇ ਹੋਏ ਚਮਚੇ ਨਾਲ ਹਮਲਾ ਕਰ ਦਿੱਤਾ। ਉਸ ਨੇ ਉਸ ਦੀ ਗਰਦਨ ’ਤੇ 3 ਵਾਰ ਚਾਕੂ ਮਾਰਿਆ। ਟੋਰੇਸ ਨੂੰ ਚਾਲਕ ਦਲ ਦੇ ਮੈਂਬਰਾਂ ਅਤੇ ਯਾਤਰੀਆਂ ਦੀ ਮਦਦ ਨਾਲ ਕਾਬੂ ਕੀਤਾ ਗਿਆ। ਇਸ ਤੋਂ ਬਾਅਦ ਫਲਾਈਟ ਬੋਸਟਨ ਏਅਰਪੋਰਟ ’ਤੇ ਸੁਰੱਖਿਅਤ ਉਤਰ ਗਈ, ਜਿੱਥੇ ਟੋਰੇਸ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ।

ਫਲਾਈਟ ’ਚ ਸਵਾਰ ਯਾਤਰੀਆਂ ਨੇ ਦੱਸਿਆ ਕਿ ਟੋਰੇਸ ਉਡਾਣ ਭਰਨ ਤੋਂ ਬਾਅਦ ਤੋਂ ਹੀ ਅਜੀਬ ਵਿਹਾਰ ਕਰ ਰਿਹਾ ਸੀ। ਉਹ ਵਾਰ-ਵਾਰ ਐਮਰਜੈਂਸੀ ਗੇਟ, ਦਰਵਾਜ਼ੇ ਦੇ ਹੈਂਡਲ ਅਤੇ ਸੁਰੱਖਿਆ ਬਾਰੇ ਪੁੱਛ ਰਿਹਾ ਸੀ। ਉਸ ਨੂੰ ਕਈ ਵਾਰ ਐਮਰਜੈਂਸੀ ਗੇਟ ਦੇ ਆਲੇ-ਦੁਆਲੇ ਘੁੰਮਦੇ ਵੀ ਦੇਖਿਆ ਗਿਆ। ਟੋਰੇਸ ਨੂੰ 9 ਮਾਰਚ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ। ਦੋਸ਼ ਸਾਬਤ ਹੋਣ ’ਤੇ ਉਸ ਨੂੰ ਉਮਰ ਕੈਦ ਦੀ ਸਜ਼ਾ ਹੋ ਸਕਦੀ ਹੈ। ਇਸ ਦੌਰਾਨ ਉਸ ’ਤੇ 4 ਕਰੋੜ ਤੋਂ ਵੱਧ ਦਾ ਜੁਰਮਾਨਾ ਲਗਾਇਆ ਜਾ ਸਕਦਾ ਹੈ।