ਹਰਿਆਣਾ ਦੇ ਭਾਜਪਾ ਨੇਤਾਵਾਂ ਨੇ ਪੰਜਾਬ ’ਚ ਲਾਏ ਡੇਰੇ
ਹਰ ਕੋਈ ਅਪਣੀ ਵੋਟ ਪੱਕੀ ਕਰਨ ਲਈ ਲਾ ਰਿਹੈ ਜੁਗਾੜ
ਜਲੰਧਰ, 24 ਅਪ੍ਰੈਲ, ਹ.ਬ. : ਹਰਿਆਣਾ ਦੇ ਭਾਜਪਾ ਆਗੂ ਇਸ ਸਮੇਂ ਪੰਜਾਬ ਵਿੱਚ ਜਲੰਧਰ ਲੋਕ ਸਭਾ ਜ਼ਿਮਨੀ ਚੋਣ (ਰਿਜ਼ਰਵ) ਵਿੱਚ ਵੋਟਰਾਂ ਨੂੰ ਲੁਭਾਉਣ ਲਈ ਕੰਮ ਕਰ ਰਹੇ ਹਨ। ਪਾਰਟੀ ਨੇ ਸੂਬੇ ਦੇ 14 ਸੰਸਦ ਮੈਂਬਰਾਂ, ਵਿਧਾਇਕਾਂ ਅਤੇ ਨੇਤਾਵਾਂ ਨੂੰ ਜ਼ਿਮਨੀ ਚੋਣਾਂ ਦੇ ਪ੍ਰਚਾਰ ਲਈ ਤਾਇਨਾਤ ਕੀਤਾ ਹੈ। ਸਾਰੇ ਆਗੂ ਪਿਛਲੇ ਦੋ ਦਿਨਾਂ ਤੋਂ ਪੰਜਾਬ ਵਿੱਚ ਭਾਜਪਾ ਉਮੀਦਵਾਰ ਲਈ ਵੋਟਾਂ ਮੰਗ ਰਹੇ ਹਨ। ਹਾਲਾਂਕਿ ਇਹ ਚੋਣ ਨਤੀਜੇ ਹੀ ਦੱਸੇਗਾ ਕਿ ਹਰਿਆਣਾ ਦੇ ਸੰਸਦ ਮੈਂਬਰਾਂ ਅਤੇ ਵਿਧਾਇਕਾਂ ਦੇ ਪ੍ਰਚਾਰ ਦਾ ਉਮੀਦਵਾਰ ਨੂੰ ਕਿੰਨਾ ਫਾਇਦਾ ਹੋਇਆ। ਹਰਿਆਣਾ ਦੀ ਸਿਰਸਾ ਤੋਂ ਸੰਸਦ ਮੈਂਬਰ ਸੁਨੀਤਾ ਦੁੱਗਲ, ਰਤੀਆ ਦੇ ਵਿਧਾਇਕ ਲਕਸ਼ਮਣ ਨਾਪਾ, ਸਾਬਕਾ ਮੰਤਰੀ ਮਨੀਸ਼ ਗਰੋਵਰ, ਰਾਜ ਸਭਾ ਮੈਂਬਰ ਕ੍ਰਿਸ਼ਨ ਪਾਲ, ਪਾਣੀਪਤ ਦੀ ਮੇਅਰ ਅਵਨੀਤ ਕੌਰ, ਹਾਂਸੀ ਦੇ ਵਿਧਾਇਕ ਵਿਨੋਦ ਭਿਆਨਾ ਇਨ੍ਹਾਂ ਦਿਨੀਂ ਜਲੰਧਰ ਪਹੁੰਚੇ ਹੋਏ ਹਨ। ਸਾਰੇ ਆਗੂਆਂ ਦੀ ਜਲੰਧਰ ਵਿੱਚ ਵੱਖ-ਵੱਖ ਖੇਤਰਾਂ ਵਿੱਚ ਡਿਊਟੀਆਂ ਲਗਾ ਦਿੱਤੀਆਂ ਗਈਆਂ ਹਨ।