ਲਾਹੌਰ, 19 ਮਈ, ਹ.ਬ. : ਪਾਕਿਸਤਾਨ ਦੇ ਸਾਬਕਾ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੇ ਘਰ ’ਤੇ ਸੁਰੱਖਿਆ ਫੋਰਸ ਛਾਪਾ ਮਾਰ ਸਕਦੀ ਹੈ। ਪੰਜਾਬ ਸੂਬੇ ਦੀ ਦੇਖ-ਰੇਖ ਸਰਕਾਰ ਮੁਤਾਬਕ ਖਾਨ ਦੇ ਜ਼ਮਾਨ ਪਾਰਕ ਸਥਿਤ ਘਰ ’ਚ 40 ਅੱਤਵਾਦੀ ਲੁਕੇ ਹੋਏ ਹਨ। ਉਨ੍ਹਾਂ ਨੂੰ ਸੁਰੱਖਿਆ ਬਲਾਂ ਨੂੰ ਸੌਂਪਣ ਦਾ ਅਲਟੀਮੇਟਮ ਵੀਰਵਾਰ ਦੁਪਹਿਰ 2 ਵਜੇ ਖਤਮ ਹੋ ਗਿਆ।
ਇਸ ਦੌਰਾਨ ਇਕ ਪੁਲਸ ਅਧਿਕਾਰੀ ਨੇ ਮੀਡੀਆ ਨੂੰ ਦੱਸਿਆ, ਸਾਡੀ ਟੀਮ ਨੇ 8 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਹ ਲੋਕ ਜ਼ਮਾਨ ਪਾਰਕ ਤੋਂ ਭੱਜਣ ਦੀ ਕੋਸ਼ਿਸ਼ ਕਰ ਰਹੇ ਸਨ। ਉਨ੍ਹਾਂ ਤੋਂ ਪੁੱਛਗਿੱਛ ਜਾਰੀ ਹੈ।
ਇਸ ਅਧਿਕਾਰੀ ਨੇ ਕਿਹਾ- ਜ਼ਮਾਨ ਪਾਰਕ ਦੇ ਕੋਲ ਇੱਕ ਪੁਲ ਹੈ। ਇਸ ਦੇ ਹੇਠਾਂ ਇੱਕ ਨਹਿਰ ਹੈ। ਪੁਲਸ ਨੇ ਪੁਲ ’ਤੇ ਪਹਿਲਾਂ ਹੀ ਨਾਕਾ ਲਾਇਆ ਹੋਇਆ ਸੀ। ਇਸ ਲਈ ਕੁਝ ਲੋਕ ਨਹਿਰ ਰਾਹੀਂ ਭੱਜਣ ਦੀ ਕੋਸ਼ਿਸ਼ ਕਰ ਰਹੇ ਸਨ। ਇਨ੍ਹਾਂ 8 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਉਨ੍ਹਾਂ ਤੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ। ਕੁਝ ਹੋਰ ਲੋਕ ਅਜਿਹਾ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ ਪਰ ਉਹ ਸਾਡੀ ਟੀਮ ਨੂੰ ਦੇਖ ਕੇ ਜ਼ਮਾਨ ਪਾਰਕ ਵਾਪਸ ਚਲੇ ਗਏ। ਸਾਡੇ ਕੋਲ ਠੋਸ ਜਾਣਕਾਰੀ ਹੈ ਕਿ ਜ਼ਮਾਨ ਪਾਰਕ ਵਿੱਚ ਬਹੁਤ ਸਾਰੇ ਲੋਕ ਲੁਕੇ ਹੋਏ ਹਨ। ਹੁਕਮ ਮਿਲਦੇ ਹੀ ਸੁਰੱਖਿਆ ਬਲ ਆਪਰੇਸ਼ਨ ਸ਼ੁਰੂ ਕਰ ਦੇਣਗੇ।
ਇਮਰਾਨ ਦੇ ਕਰੀਬੀ ਦੋਸਤ ਅਤੇ ਪਾਕਿਸਤਾਨ ਦੇ ਰਾਸ਼ਟਰਪਤੀ ਆਰਿਫ ਅਲਵੀ ਨੇ ਪਹਿਲੀ ਵਾਰ 9 ਅਤੇ 10 ਮਈ ਨੂੰ ਹੋਈ ਹਿੰਸਾ ’ਤੇ ਪ੍ਰਤੀਕਿਰਿਆ ਦਿੱਤੀ। ਜੀਓ ਨਿਊਜ਼ ਨੂੰ ਦਿੱਤੇ ਇੰਟਰਵਿਊ ’ਚ ਅਲਵੀ ਨੇ ਕਿਹਾ- ਇਮਰਾਨ ਨੂੰ 9 ਮਈ ਨੂੰ ਹੋਈ ਹਿੰਸਾ ਦੀ ਨਿੰਦਾ ਕਰਨੀ ਚਾਹੀਦੀ ਹੈ। ਹਾਲਾਂਕਿ ਪੁਲਿਸ ਵੀ ਗਲਤ ਕਾਰਵਾਈ ਕਰ ਰਹੀ ਹੈ। ਸਾਰੀਆਂ ਪਾਰਟੀਆਂ ਨੂੰ ਇਕਜੁੱਟ ਹੋ ਕੇ ਦੇਸ਼ ਦੀਆਂ ਸਮੱਸਿਆਵਾਂ ਦਾ ਹੱਲ ਲੱਭਣਾ ਹੋਵੇਗਾ। ਮੇਰੇ ’ਤੇ ਕਿਸੇ ਵੀ ਮਾਮਲੇ ’ਚ ਦਖਲ ਦੇਣ ਦਾ ਦੋਸ਼ ਗਲਤ ਹੈ। ਪਾਕਿਸਤਾਨ ਦੇ ਗ੍ਰਹਿ ਮੰਤਰੀ ਰਾਣਾ ਸਨਾਉੱਲਾ ਨੇ ਜੀਓ ਨਿਊਜ਼ ਨੂੰ ਦੱਸਿਆ, ਸਾਡੇ ਕੋਲ ਸਾਰੇ ਤਕਨੀਕੀ ਸਬੂਤ ਹਨ। 8 ਮਈ ਨੂੰ ਖੈਬਰ ਪਖਤੂਨਖਵਾ ਤੋਂ ਲਗਭਗ 88 ਲੋਕਾਂ ਨੂੰ ਜ਼ਮਾਨ ਪਾਰਕ ਲਿਆਂਦਾ ਗਿਆ ਸੀ। ਇਨ੍ਹਾਂ ਲੋਕਾਂ ਨੇ 9 ਮਈ ਨੂੰ ਜਿਨਾਹ ਹਾਊਸ, ਆਰਮੀ ਹੈਡਕੁਆਰਟਰ ਅਤੇ ਆਈਐਸਆਈ ਹੈਡਕੁਆਰਟਰ ’ਤੇ ਹਮਲਾ ਕੀਤਾ ਸੀ। ਇਨ੍ਹਾਂ ਵਿਅਕਤੀਆਂ ਦੀ ਸ਼ਨਾਖਤ ਤੋਂ ਬਾਅਦ ਮੋਬਾਈਲ ਫੋਨ ਟਰੇਸ ਕੀਤੇ ਗਏ। ਜ਼ਮਾਨ ਪਾਰਕ ਵਿੱਚ ਟਿਕਾਣਾ ਮਿਲਿਆ ਸੀ। ਜਾਂ ਤਾਂ ਖਾਨ ਨੂੰ ਖੁਦ ਉਨ੍ਹਾਂ ਦੇ ਹਵਾਲੇ ਕਰ ਦਿੱਤਾ ਜਾਵੇ ਜਾਂ ਸੁਰੱਖਿਆ ਬਲ ਆਪਣਾ ਕੰਮ ਕਰਨ।
ਰਾਣਾ ਨੇ ਅੱਗੇ ਕਿਹਾ- ਇਹ 40 ਲੋਕ ਉਹੀ ਹਨ, ਜਿਨ੍ਹਾਂ ਨੂੰ ਇਮਰਾਨ ਨੇ ਪ੍ਰਧਾਨ ਮੰਤਰੀ ਹੁੰਦਿਆਂ ਰਿਹਾਅ ਕੀਤਾ ਸੀ। ਉਸ ਦਾ ਸਬੰਧ ਤਾਲਿਬਾਨ ਨਾਲ ਹੈ। ਖਾਨ ਹੁਣ ਉਨ੍ਹਾਂ ਨੂੰ ਸੁਰੱਖਿਆ ਬਲਾਂ ਖਿਲਾਫ ਵਰਤ ਰਿਹਾ ਹੈ। ਇਮਰਾਨ ਦੀ ਪਾਰਟੀ ਪਾਕਿਸਤਾਨ ਤਹਿਰੀਕ-ਏ-ਇਨਸਾਫ (ਪੀਟੀਆਈ) ਦੇ ਸੀਨੀਅਰ ਨੇਤਾ, ਸਾਬਕਾ ਕੈਬਨਿਟ ਮੰਤਰੀ ਅਤੇ ਖਾਨ ਦੇ ਵਿਸ਼ੇਸ਼ ਸਲਾਹਕਾਰ ਮਲਿਕ ਅਮੀਨ ਅਸਲਮ ਨੇ ਪਾਰਟੀ ਛੱਡ ਦਿੱਤੀ ਹੈ। ਅਸਲਮ ਨੇ ਪ੍ਰੈਸ ਕਾਨਫਰੰਸ ਵਿੱਚ ਕਿਹਾ , ਦੇਸ਼ ਨੂੰ ਤੋੜਨ ਵਾਲੇ ਏਜੰਡੇ ਨਾਲ ਚੱਲਣਾ ਅਸੰਭਵ ਹੈ। ਮਲਿਕ ਪੀਟੀਆਈ ਵਰਕਿੰਗ ਕਮੇਟੀ ਦੇ ਚੇਅਰਮੈਨ ਸਨ। ਹੁਣ ਤੱਕ ਕੁੱਲ 6 ਸੀਨੀਅਰ ਆਗੂ ਪੀਟੀਆਈ ਛੱਡ ਚੁੱਕੇ ਹਨ।